വീട് പണിക്ക് വരുന്ന ചിലവുകള്‍ എങ്ങനെ കുറയ്ക്കാം

സ്വന്തമായി ഒരു വീട് സ്വപ്നം കണ്ട് തുടങ്ങുമ്പോൾ വീടുപണിയുടെ വിവിധ വശങ്ങളെ കുറിച് അറിഞ്ഞിരുന്നാൽ പാഴ്ചിലവുകൾ ഒഴിവാക്കി, നിങ്ങളുടെ ജീവിത ശൈലിക്ക് ഇണങ്ങുന്ന വീട് പണിയാം

നിങ്ങളുടെ വീട്ടില്‍ എത്ര മുറികളുണ്ട്? പെട്ടെന്ന് മറുപടി പറയാന്‍ ബുദ്ധിമുട്ടാണെങ്കില്‍ ഒരു കാര്യം തീര്‍ച്ച. ഒരിക്കല്‍പോലും വീട്ടിലെ മുഴുവന്‍ സ്ഥലങ്ങളും പൂര്‍ണമായും നിങ്ങള്‍ ഉപയോഗിച്ചിരിക്കാനിടയില്ല. എങ്കില്‍പ്പിന്നെ എപ്പോഴും പൊടിപിടിച്ചുകിടക്കാന്‍മാത്രം എന്തിനാണിത്ര സ്ഥലം?

കൃത്യമായ പ്ലാനിങ്

ആര്‍കിടെക്റ്റുമായി ഒരു തുറന്ന ചര്‍ച്ച പ്രധാനമാണ്. സ്വപ്‌നങ്ങളില്‍നിന്ന് ആവശ്യങ്ങളെ പെറുക്കിയെടുക്കാന്‍ പ്ലാനിങ് സഹായിക്കും. ചെലവാക്കാന്‍ സാധിക്കുന്ന സംഖ്യ മുന്‍കൂട്ടി കണ്ടുകൊണ്ട് സങ്കല്പങ്ങളെ നടപ്പിലാക്കാനാണ് ശ്രമിക്കേണ്ടത്. ശ്രദ്ധിക്കേണ്ട മറ്റൊരു കാര്യം ആദ്യം നിശ്ചയിച്ച പ്ലാനില്‍ നിര്‍മാണ സമയത്ത് മാറ്റം വരുത്താതിരിക്കുക എന്നതാണ്. അങ്ങനെ സംഭവിച്ചാല്‍ ചെലവ് കൈപ്പിടിയിലൊതുങ്ങാതെ വന്നേക്കാം.

പ്ലാന്‍ രൂപകല്പന പൂര്‍ത്തിയായാല്‍ പണി തുടങ്ങുന്നതിനുമുന്‍പ് വിശദമായ എസ്റ്റിമേറ്റും വര്‍ക്ക് പ്രോഗ്രാം ചാര്‍ട്ടും തയ്യാറാക്കാന്‍ ആര്‍കിടെക്ടിനോട് ആവശ്യപ്പെടണം. ഇത് വീടുപണിയുടെ ഓരോ ഘട്ടത്തിലും എത്ര ചെലവു വരും എന്നും എത്ര സമയംകൊണ്ട് ഓരോ ഘട്ടവും പൂര്‍ത്തിയാക്കാന്‍ കഴിയും എന്നും മുന്‍കൂര്‍ ധാരണ ഉണ്ടാക്കാന്‍ സഹായിക്കും.

വീടിന്‍റെ വലിപ്പമാണ് ചെലവ് കൂട്ടുന്ന മറ്റൊരു പ്രധാന സംഗതി. വീടിന്‍റെ വലിപ്പം കൂടുന്നതുകൊണ്ട് നിര്‍മാണ സാമഗ്രികളുടെ ചെലവ് മാത്രമല്ല കൂടുന്നത്, വീട്ടുകരവും കൂടും. ഒറ്റനില വീടുകളേക്കാള്‍ ഇരുനില വീടുകളാണ് കൂടുതല്‍ ലാഭം. ഉറച്ച മണ്ണില്‍ ഒറ്റനിലയ്ക്കും രണ്ടുനിലയ്ക്കും അടിത്തറവണ്ണത്തിലും ആഴത്തിലും ചെറിയ വ്യത്യാസമേയുള്ളൂ. ഒന്നാം നിലയുടെ ടെറസില്‍ രണ്ടാംനിലയുടെ മുറികള്‍ വരുന്നതിനാല്‍ അത്രയും ചതുരശ്രഅടി ഭാഗത്ത് ഫ്ലോറിങ്ങിന് മുമ്പുള്ള ചെലവ് ആകുന്നില്ല.

വീട് പണിയുമ്പോള്‍ ബാങ്ക് വായ്പ എടുത്ത് പണിയുകയാവും നല്ലത്. വര്‍ഷങ്ങള്‍ കഴിയുന്തോറും രൂപയുടെ മൂല്യം കുറയാനാണ് സാധ്യത. ആദായനികുതിയിനത്തിലും പണം ലാഭിക്കാം. വീടുപണിക്ക് സ്ഥലം നിശ്ചയിക്കുമ്പോള്‍ മണ്ണിന്‍റെ ഉറപ്പ്, വൈദ്യുതി, വാട്ടര്‍ കണക്ഷന്‍ ലഭ്യത എന്നിവ ഉറപ്പാക്കണം.  മലമുകളിലും ചതുപ്പുനിലത്തുമെല്ലാം വീട് പണിയുമ്പോള്‍ മണ്ണിന്‍റെ ഉറപ്പ് അറിഞ്ഞിരിക്കണം.

വീടിന്‍റെ ആകൃതിയും ചെലവും തമ്മില്‍ ബന്ധമുണ്ട്. ചതുരാകൃതിയിലുള്ള വീടാണ് ഏറ്റവും നല്ലത്. കൂടുതല്‍ കട്ടിങ്ങും വളവുകളും തിരിവുകളുമുള്ള വീടിന് ഭിത്തിയുടെ വിസ്തീര്‍ണം കൂടും. സ്ഥലം ഉപയോഗശൂന്യമാവുകയും ചെയ്യും. കല്ല് കെട്ടാനും തേയ്ക്കാനും ചെലവ് കൂടും. വീടിനു ചുറ്റും വരാന്ത പണിയുന്നത് ഇപ്പോള്‍ ട്രെന്‍ഡായിട്ടുണ്ട്. എന്നാല്‍ പുതുമ തീരുന്നതുവരെ മാത്രമേ ഈ ആവേശം കാണൂ. അത്രകണ്ട് ഉപയോഗമില്ലാത്ത വരാന്ത വേണോ എന്ന് നല്ലവണ്ണം ചിന്തിച്ചശേഷം മാത്രം തീരുമാനമെടുക്കുക. അടുക്കളയോട് ചേര്‍ന്ന് വര്‍ക് ഏരിയ, സ്റ്റോര്‍ റൂം എന്നിവ വേറെ പണിയേണ്ട ആവശ്യമില്ല. അടുക്കളയില്‍തന്നെ ഇതിനുള്ള സ്ഥലം കണ്ടെത്തുകയാണ് നല്ലത്.

എല്ലാ സൗകര്യത്തോടുംകൂടിയ കിടപ്പുമുറി ഒരുക്കാന്‍ 120 സ്‌ക്വയര്‍ഫീറ്റില്‍ കൂടുതല്‍ സ്ഥലം ആവശ്യമില്ല. അതുപോലെ ചെറിയ ബാത്ത്‌റൂമുകളാണ് പുതിയ ട്രെന്‍ഡ്. മിനിമം 6:6 അടി വിസ്തീര്‍ണം മതിയാവും. വൃത്തിയാക്കാനുള്ള എളുപ്പവുമുണ്ട്. ലോകോസ്റ്റ് സങ്കല്പത്തില്‍ മാസ്റ്റര്‍ ബെഡ് റൂമിനോട് ചേര്‍ന്ന് ഒരു ബാത്ത് റൂം, പിന്നെ ഒരു പൊതുബാത്ത് റൂം എന്നതാണ് രീതി.

വീടിന് ചെലവഴിക്കുന്ന തുകയുടെ എട്ടു ശതമാനത്തില്‍ കൂടുതല്‍ ബാത്ത് റൂമിനായി ചെലവഴിക്കരുതെന്നാണ് പൊതുതത്ത്വം. ബാത്ത്‌റൂമിനായി ടൈല്‍സും ഫിക്‌ചേഴ്‌സുമൊക്കെ വാങ്ങുമ്പോള്‍ പ്രത്യേക ശ്രദ്ധ വേണം. ബാത്ത്ടബ് വെക്കുന്നത് അധികച്ചെലവാണെന്നു മാത്രമല്ല, ഇവ ഉപയോഗിക്കുന്നതുതന്നെ അപൂര്‍വമാവും.

സാധനങ്ങള്‍ വാങ്ങുമ്പോള്‍

നിര്‍മാണ സാമഗ്രികള്‍ വാങ്ങുമ്പോഴുള്ള ശ്രദ്ധയാണ് ചെലവ് കുറയ്ക്കാന്‍ പറ്റിയ മാര്‍ഗം. നിര്‍മാണ സാമഗ്രികള്‍ വാങ്ങുമ്പോള്‍ പ്ലാനിങ്ങുണ്ടെങ്കില്‍ ട്രാന്‍സ്‌പോര്‍ട്ടിങ് ചാര്‍ജ് കുറയ്ക്കാം. അടുത്ത് ലഭ്യമായ സാധനങ്ങള്‍ കൂടുതല്‍ ഉപയോഗിക്കാം. ധാരാളം വെട്ടുകല്ലു കിട്ടാനുള്ളപ്പോള്‍ ദൂരെനിന്ന് ചുടുകട്ട കൊണ്ടുവരുന്നത് നഷ്ടമുണ്ടാക്കും.

മണല്‍, ഇഷ്ടിക, വെട്ടുകല്ല് തുടങ്ങിയവ സീസണില്‍ വാങ്ങി സ്റ്റോക്കു ചെയ്താല്‍ നന്നായിരിക്കും. ക്വാറികളും കളങ്ങളും പ്രവര്‍ത്തിക്കാത്തതിനാല്‍ വെട്ടുകല്ലിനും ഇഷ്ടികയ്ക്കും മഴക്കാലത്ത് വിലകൂടുക സ്വാഭാവികം. മഴക്കാലത്താണ് വീടുപണി ഉദ്ദേശിക്കുന്നതെങ്കില്‍ ഇവ മുന്‍കൂട്ടി വാങ്ങിവെക്കുക. അതേസമയം മഴക്കാലത്ത് പുഴയില്‍ മണല്‍ വാരുന്നതിന് നിയന്ത്രണം കുറവായതിനാല്‍ ആ സമയത്ത് ആവശ്യമായ മണല്‍വാങ്ങി സ്റ്റോക്ക് ചെയ്യുന്നതാണ് നല്ലത്.

ഇന്‍റര്‍ലോക് ഇഷ്ടികയാണ് വാങ്ങിക്കുന്നതെങ്കില്‍ ഇത് ഉപയോഗിച്ച് വീട് പണിയുമ്പോള്‍ സിമന്‍റ്, മണല്‍ എന്നിവയുടെ ചെലവ് വളരെ കുറയ്ക്കാം. ഇതില്‍ പ്ലാസ്റ്ററിങ്ങില്ല, പെയിന്‍റിംങ്ങും വേണ്ട. വീടിനാവശ്യമുള്ള മുഴുവന്‍ തടിയും ഒന്നിച്ചു വാങ്ങുന്നതാണ് ലാഭം. പഴയ മര ഉരുപ്പടികള്‍ വാങ്ങാന്‍ കിട്ടുമെങ്കില്‍ അതാണ് നല്ലത്. പഴയ ഉരുപ്പടികള്‍ക്ക് നിശ്ചിത വില ഇല്ലാത്തതിനാല്‍ പരമാവധി വിലകുറച്ച് വാങ്ങാന്‍ കഴിയും. മരപ്പണിക്കു വരുന്ന ചെലവ് കുറയ്ക്കാനും സാധിക്കും.

വാതിലുകള്‍ക്കും ജനലുകള്‍ക്കും തടികൊണ്ടുള്ള ഫ്രെയിം ഒഴിവാക്കി കോണ്‍ക്രീറ്റാക്കിയാല്‍ ചെലവ് മൂന്നിലൊന്നു കുറയും. തടിതന്നെ വേണമെന്ന് നിര്‍ബന്ധമുള്ളവര്‍ വിലകൂടിയ തേക്കും ഈട്ടിയുമൊന്നും വാങ്ങാതെ ആഞ്ഞിലി, പ്ലാവ് പോലുള്ള താരതമ്യേന വിലകുറഞ്ഞതും എന്നാല്‍ ഗുണനിലവാരം ഉള്ളതുമായ മരങ്ങള്‍ തിരഞ്ഞെടുക്കുക. ജനല്‍ ഗ്രില്ലിന് പണ്ട് പല രൂപത്തില്‍ പണിതെടുത്ത ഗ്രില്ലുകളായിരുന്നു ഫാഷന്‍. ഇതിന്റെ നാലിലൊന്നു ചെലവേ പട്ടയും കമ്പിയും ഉപയോഗിച്ചുള്ള ജനല്‍ഗ്രില്ലുകള്‍ക്ക് വരൂ.

ബാത്ത്‌റൂമിലേക്ക് സാനിറ്ററി ഫിറ്റിങ്ങുകള്‍ വാങ്ങുമ്പോള്‍ വെള്ള നിറത്തിലുള്ളവയ്ക്ക് വില കുറവാണ്. ഇളം നിറങ്ങള്‍ക്കും കടും നിറങ്ങള്‍ക്കും ചെലവ് ഏറും. ടോയ്‌ലറ്റിന് പ്ലാസ്റ്റിക്, ഫൈബര്‍ വാതിലുകള്‍ വെച്ചാല്‍ ലാഭകരമായിരിക്കും.

വയറിങ് സാധനങ്ങള്‍ ഏറ്റവും ഉപയോഗമുള്ള സ്ഥലത്ത് മുന്തിയതുതന്നെ വേണം. ഉപയോഗം കുറഞ്ഞ കിടപ്പുമുറി, പൂജാമുറി തുടങ്ങിയ സ്ഥലങ്ങളില്‍ സ്വിച്ചുകളും ലൈറ്റുകളും കുറഞ്ഞ വിലയുടേതായാലും കുഴപ്പമില്ല. പ്ലംബിങ് സാധനങ്ങള്‍ വാങ്ങുമ്പോഴും ഇതേ കാര്യങ്ങള്‍ ശ്രദ്ധിക്കണം. അടുക്കള, ടോയ്‌ലറ്റ് തുടങ്ങിയ സ്ഥലങ്ങളിലേക്ക് മുന്തിയ തരവും മറ്റുള്ളത് വില കുറഞ്ഞ തരവുമാകാം. ഉദാഹരണത്തിന് അടുക്കളയിലെ വാഷിങ് സിങ്കിലുള്ള ടാപ്പ് നല്ലതുവേണം. പക്ഷേ, പാചകത്തിന് വെള്ളം എടുക്കുന്ന ടാപ്പ് അത്ര മികച്ചതാകണമെന്നില്ല.

പണിക്കിടയിലും ലാഭിക്കാം

പുറം ചുമരുകള്‍ തേക്കാതിരുന്നാല്‍ പ്ലാസ്റ്ററിങ്ങിനും പെയിന്റിങ്ങിനും വരുന്ന ചെലവുകള്‍ ലാഭിക്കാം. 1500 ചതുരശ്ര അടി പ്ലാസ്റ്റര്‍ ചെയ്യാതിരുന്നാല്‍ 50,000 രൂപയോളം ലാഭം കിട്ടും. തേച്ച ചുമരുകള്‍ക്ക് പ്ലാസ്റ്റിക് എമല്‍ഷനോ അക്രിലിക് ഡിസ്റ്റംബറോ വാഷബിള്‍ ഡിസ്റ്റംബറോ അടിക്കാം.

കോണ്‍ക്രീറ്റ് ചെയ്യുന്നതിലെ ചെലവു കുറയ്ക്കാന്‍ വേണമെങ്കില്‍ ഓടു വെച്ചു വാര്‍ക്കാം. 30-40 ശതമാനം ചെലവ് കുറയും. സിമന്‍റിന്‍റെയും കമ്പിയുടേയും മണലിന്‍റെയും അളവ് കുറയുന്നതുകൊണ്ടാണ് ഓട് വെച്ചു വാര്‍ക്കുമ്പോള്‍ ചെലവ് കുറയുന്നത്.

സ്റ്റീല്‍ ഉത്തരങ്ങളും ഗാല്‍വനൈസ്ഡ് ഇരുമ്പ് ഷീറ്റുകളും ഉപയോഗിച്ചുള്ള മേല്‍ക്കൂരകളും ചെലവ് കുറഞ്ഞവയാണ്. ആര്‍.സി.സി. പാനലുകൊണ്ടുള്ള ഫെറോസിമന്ററ് മേല്‍ക്കൂരകളും ചെലവ് കുറഞ്ഞവയാണ്. താഴത്തെ നില വാര്‍ക്കയിട്ട് മുകളിലത്തെ നില ഓട് മേയുന്ന ഫാഷന്‍ ഇപ്പോള്‍ പ്രചാരത്തിലുണ്ട്. ഓട് മേയാന്‍ മരത്തിന്റെ കഴുക്കോലുകള്‍ക്കുപകരം ഒന്നരയിഞ്ച് ജി.ഐ.പൈപ്പുകള്‍ വെക്കാം. ചെലവ് പകുതി കുറയും.

വീടിന്‍റെ അകത്തളം 

സ്റ്റെയര്‍കെയ്‌സിനെ അലങ്കാരവസ്തുവാക്കാന്‍ ശ്രമിക്കരുത്. ലളിതവും ചെലവ് കുറഞ്ഞതുമായ സ്റ്റെയര്‍ കെയ്‌സുകള്‍ നിര്‍മിക്കാന്‍ സ്റ്റീലും മരവും ധാരാളം. ഹാന്റ് റേലുകള്‍ക്ക് വിലകുറഞ്ഞ സ്റ്റീല്‍ പൈപ്പുകള്‍ ഉപയോഗിച്ചാല്‍ മതി. ഒരു ഷോപ്പിങ് കോംപ്ലക്‌സിന്‍റെ സ്റ്റെയര്‍കെയ്‌സിന് വേണ്ടിവരുന്ന അത്ര ഉറപ്പ് വീടിന്‍റെ സ്റ്റെയര്‍ കെയ്‌സിന് ആവശ്യമില്ല.

അടുക്കള, സ്റ്റോര്‍മുറി, വര്‍ക് ഏരിയ എന്നിങ്ങനെ വേര്‍തിരിക്കാതെ പണിയുന്നത് ചെലവ് കുറയ്ക്കും. നീളം കൂടിയ വീതി കുറഞ്ഞ അടുക്കളയാണ് നല്ലത്. വെയിലിനേയും മഴയേയും വീട്ടിലേക്കു ക്ഷണിക്കുന്ന നടുമുറ്റം വീടിനെക്കുറിച്ചുള്ള സങ്കല്പങ്ങളിലേക്ക് കടന്നുവരാറുണ്ട്. എന്നാല്‍, നടുമുറ്റം സ്ഥലം നഷ്ടപ്പെടുത്താനും ചെലവ് കൂട്ടാനും മാത്രം ഉപകരിക്കുന്നതായി മാറുകയാണ് പതിവ്. അതുകൊണ്ട് വീടിന്റെ ഭിത്തിയും പുറംമതിലും വരാന്തകള്‍കൊണ്ട് യോജിപ്പിച്ച് ഒരു സൈഡ് മുറ്റം പണിയുന്നതാണ് പുതിയ ട്രെന്‍ഡ്. ചെലവും കുറയും.

വീടിനകത്തെ ഭിത്തികള്‍ക്ക് പുറത്തെ ഭിത്തിയുടെ കനം വേണ്ട. പുറംഭിത്തി 10 ഇഞ്ചാണെങ്കില്‍ അകത്തെ ഭിത്തിക്ക് നാലര ഇഞ്ച് കനം ധാരാളം മതി. ഇഷ്ടികയുടെ എണ്ണവും സിമന്റ് ചെലവും ഇതുവഴി കുറയ്ക്കാന്‍ കഴിയും. ചെറിയ വീടാണെങ്കില്‍ ലിന്റല്‍ ഒഴിവാക്കി പകരം വാതില്‍, ജനല്‍ ഫ്രെയിമുകള്‍ക്ക് മുകളില്‍ ആര്‍ച്ചുകള്‍ പണിയാം. കമ്പി, സിമന്‍റ്, വാര്‍ക്കക്കൂലി, സമയം എന്നിവ ലാഭം. സണ്‍ഷേഡുകള്‍ ജനലിനു മുകളില്‍മാത്രം മതി. മെയിന്‍ വാര്‍ക്കയുടെ അറ്റം ചെരിച്ചുവാര്‍ത്താല്‍ സണ്‍ഷേഡിന്‍റെ ഗുണം കിട്ടും. പണിയും നിര്‍മാണ സാമഗ്രികളും ലാഭം.